Özbegistan çagalar üçin zyýanly iýmitleriň mahabatyny çäklendirýär
Özbegistanda «Dogry iýmitlenmek we sagdyn durmuş ýörelgesi» atly tutuş ýurt boýunça hereket başlaýar. UzA agentliginiň habaryna görä, bu ädim Prezident Mirziýoýewiň «Täze Özbegistanyň 2022-2026-njy ýyllar üçin «Adamyň we ýokary hilli bilim aladasy ýylynda» ösüş strategiýasyny durmuşa geçirmek boýunça döwlet maksatnamasy» baradaky kararyna laýyklykda ädildi.
Şol bir wagtyň özünde, ilata smartfonlar we ykjam goşundylar arkaly saglyk we iýmitlenişine gözegçilik etmek hem-de dogry iýmitlenmek boýunça ykjam goşundy döretmek meýilleşdirilýär. Çagalar üçin niýetlenen sagdyn iýmitleriň we içgileriň, çaga iýmitleriniň we energetik içgileriniň, dermanlaryň we biologiki taýdan işjeň maddalaryň mahabatyna bildirilýän talaplar we çäklendirmeler güýçlendiriler.
Şeýle hem, döwlet maksatnamasy bilim edaralary üçin önümleriň sanawyny tassyklamagy we köp mukdarda şeker, duz, trans ýaglary, tagamlar we boýaglary öz içine alýan çagalar we ýaşlar üçin maslahat berilmeýän azyk önümleriniň sarp edilişini azaltmagy göz öňünde tutýar.
Özbegistanyň prezidentiniň saýtynda şu ýylyň 28-nji fewralynda çap edilen ýokarda agzalan karar, esasanam, 2023-2024-nji okuw ýylyndan başlap, respublikanyň ähli sebitlerinde we Daşkent şäherinde başlangyç synp okuwçylaryny mugt nahar bilen üpjün etmegi göz öňünde tutýar. Şol bir wagtyň özünde, okuwçylaryň ýaşyna we saglyk ýagdaýyna görä kadalaşdyrylan iýmitiň berilmegini, şeýle hem olaryň sanitariýa talaplaryna laýyk gelmegini üpjün eder.
ORIENT news
