Türkmenistan Merkezi Aziýa ýurtlarynyň we Russiýanyň Howpsuzlyk geňeşleriniň sekretarlarynyň mejlisine gatnaşdy
Almatyda Merkezi Aziýa ýurtlarynyň we Russiýanyň Howpsuzlyk geňeşleriniň sekretarlarynyň ilkinji duşuşygy geçirildi.
Gazagystanyň Prezidenti Kasym-Jomart Tokaýew mejlise gatnaşyjylara wideo ýüzlenme ugratdy. Ol sebitiň iň wajyp wezipeleriniň howpy çaklamagy, öňüni alyş çärelerini we hil taýdan täze integrirlenen çemeleşmeleri dessin işläp düzmegi talap edýän durnuklylygy saklamak we howpsuzlygy berkitmek ýaly meseleler bolup durýandygyny belledi – diýip, Akorda metbugat gullugy habar berýär.
Howpsuzlyk geňeşleriniň sekretarlary häzirki halkara ýagdaýdan we sebit ýurtlarynyň milli bähbitlerinden ugur almak bilen hyzmatdaşlygyň anyk ugurlaryna garadylar.
Umumy ekoulgamy gorap saklamagyň zerurdygy göz öňünde tutulyp, şol sanda howanyň üýtgeme şertlerinde suw howpsuzlygy meselelerine aýratyn üns berildi.
Russiýa Federasiýasynyň Howpsuzlyk geňeşiniň metbugat gullugy terrorçylyga garşy ugurda hyzmatdaşlyga, transmilli jenaýatçylyga we neşe serişdeleriniň bikanun ýaýradylmagyna garşy bilelikdäki göreşe, howpsuzlyga abanýan howplara aýratyn üns berilendigini habar berdi.
Ara alnyp maslahatlaşylan meseleleriň ähmiýeti göz öňünde tutulyp, Gazagystanyň, Gyrgyzystanyň, Täjigistanyň, Türkmenistanyň, Özbegistanyň we Russiýanyň gatnaşmagynda şular ýaly duşuşyklary yzygiderli geçirmek teklip edildi.
ORIENT news
