Aşgabatda Medeniýet hepdeliginiň dabaraly açylyşy boldy
Şu gün paýtagtymyzda Medeniýet hepdeliginiň dabaraly açylyşy boldy. Paýtagtymyzda geçirilýän Medeniýet hepdeligine gatnaşmak üçin ýurdumyzyň sebitlerinden meşhur teatr artistleri, estrada we halk aýdymlaryny ýerine ýetirijiler, muzeý we kitaphana işiniň hünärmenleri, suratkeşler, şahyrlar, meşhur ansambl we folklor-etnografik toparlary geldiler.
Medeniýet hepdeliginiň Döwlet medeniýet merkeziniň Mukamlar köşgünde geçirilen açylyş dabarasyna köpsanly gatnaşyjylar, paýtagtymyzyň ýaşaýjylary we myhmanlary gatnaşdylar. Bu ýerde milli senetçilik, keramika, heýkeltaraşlyk, zergärçilik we şekillendiriş sungatynyň önümleri görkezildi.
Mukamlar köşgünde ýurdumyzyň sungat ussatlarynyň we meşhur döredijilik toparlarynyň çykyş etmeklerinde uly baýramçylyk dabarasy guraldy.
Medeniýet hepdeliginiň açylyşyna bagyşlanan çäreler günüň ikinji ýarymynda Döwlet medeniýet merkeziniň Döwlet muzeýinde dowam eder. Bu ýerde “Muzeýlerde gurnalan sanly ulgamyň mümkinçilikleriniň muzeý işini ösdürmekdäki ähmiýeti” atly muzeý hünärmenleriniň iş maslahaty hem-de muzeý gymmatlyklaryny rejelemek işini kämilleşdirmekde dünýä tejribesini öwrenmek boýunça usulyýet okuwlary geçiriler.
ORIENT news
