Türkmenistan we Ermenistan bilelikdäki kärhanalary döretmegiň mümkinçiliklerini ara alyp maslahatlaşdylar
Söwda- ykdysady hyzmatdaşlygyny giňeltmegiň, iki ýurduň işewür toparlarynyň arasynda aragatnaşyklary ýola goýmagyň meseleleri Türkmenistanyň Ermenistandaky ilçisi Muhammetgeldi Aýazowyň Ermenistanyň Söwda-senagat palatasynyň direktory Andranik Aleksanýan we palatanyň wise-prezidenti Karen Iwanow bilen duşuşygynyň barşynda ara alnyp maslahatlaşyldy.
Hususanda, bilelikdäki türkmen-ermeni kärhanalaryny döretmek, ermeni kärhanalarynyň Türkmenistanda geçirilýän dürli halkara forumlaryna we sergilerine gatnaşmagyny gurnamak barada teklipler aýdyldy. Ermenistanyň SSP-nyň wekilleri Türkmenistanyň ulag we logistika babatyndaky uly mümkinçiligini bellediler.
Öz gezeginde, türkmen diplomaty açylmaga taýýarlanylýan döwlet ähmiýetli Arkadag şäheri barada maglumat berdi, onda dürli maksatlar üçin desgalaryň guruljakdygyny aýtdy.
Söwda-ykdysady hyzmatdaşlygy şeýle hem Muhammetgeldi Aýazowyň Ermenistanyň senagatçylar we telekeçiler Birleşmesiniň başlygynyň orunbasary Nerses Karamanukýan bilen duşuşygynda esasy temalaryň biri boldy.
Nerses Karamanukýan ermeni telekeçileriniň türkmen kärdeşleri bilen söwda-ykdysady aragatnaşygyna gyzyklanýandygyny bildirdi.
ORIENT habarlar
