Türkmenistandaky iň iri gaz ýatagyndan tebigy gazyň täze senagat akymy alyndy
Iýun 20, 2023 | 12:38 |7263
“Galkynyş” gaz ýatagy ýurdumyzdaky iň iri, şol sanda dünýädäki iň iri gaz känleriniň biridir. Täzelikde gazçylar «Galkynyş» gaz känindäki 271-nji belgili ulanyş gaz guýusynda 4 müň 665 metr çuňlukda buraw işlerini üstünlikli ýerine ýetirdiler. Şunlukda 4 müň 518 — 4 müň 333 metr aralyklardaky gatlaklarda geçirilen partladyş işleriniň netijesinde tebigy gazyň ýokary basyşly, senagat ähmiýetli akymy alyndy. Bu barada “Türkmenistan” gazeti habar berýär.
Bu gaz guýusynyň buraw we gurluşyk işlerinde gaz käniniň geologik we tehnologik häsiýetlerine laýyk gelýän Ýaponiýanyň öňdebaryjy «Sumitomo» kompaniýasynyň oturtma we sorujy-gysyjy turbalary, çüwdürim (fontan) armaturalary, sütün başlary giňden peýdalanyldy.
ORIENT news
