GDA-nyň çempionaty hakyndaky Düzgünnamanyň taslamasy ylalaşyldy
Bilermenler toparynyň goşmaça mejlisinde Arkalaşgyň ýurtlarynyň wekilleri GDA-nyň Çempionaty (Birinjiligi, Kubogy) hakyndaky Düzgünnamanyň taslamasyny ylalaşdylar. Bu barada Arkalaşygyň Ýerine ýetiriji komitetiniň metbugat-gullugy habar berýär.
Düzgünnamanyň taslamasy GDA ýurtlarynyň Oýunlaryny taýýarlamak we geçirmek boýunça Iş toparynyň işjeňliginiň çäklerinde işlenip düzüldi. GDA-nyň çempionatlaryny gurnamak pikiri Arkalaşykda GDA ýurtlarynyň her iki ýyldan bir gezek geçirilýän Oýunlarynyň arasynda derejeli sport bäsleşiklerini geçirmek teklibi bilen şertlendirilendir. Çempionatlar GDA ýurtlarynda sportyň olimpiýa, paralimpiýa, surdlimpiýa (deflimpiýa), tehniki, awiasiýa, harby-amaly we gulluk-amaly görnüşleri boýunça, şeýle hem sportyň olimpiýa däl we milli görnüşleri boýunça kadaly esasda geçiriler.
Bir ýylyň dowamynda sportyň aýry-aýry görnüşi boýunça Arkalaşygyň diňe bir çempionaty ýa-da birinjiligi, ýa-da kubogy geçirilip bilner. Olaryň geçirilýän ýeri we seneleri baradaky karar Geňeş tarapyndan döwletleriň teklipleriniň esasynda kabul ediler.
Düzgünnamanyň taslamasyny GDA hökümetleriniň baştutanlarynyň Geňeşiniň garamagyna çykarmaklyk meýilleşdirilýär.
ORIENT habarlar
