BMGÖM çölleşmäge garşy Bütindünýä güni mynasybetli plakatlaryň bäsleşigini geçirýär
Çölleşmäge garşy Bütindünýä güni mynasybetli Aşgabatdaky BMG-nyň ösüş Maksatnamasy #HerLand #HerRights bäsleşigine badalga berýär.
Döredijilik bäsleşigi çölleşmek, topragyň hasyllylygynyň peselmegi we ýerleriň zaýalanmagy ýaly meselelere jemgyýetçiligiň ünsüni çekmäge gönükdirilendir.
Bäsleşige gatnaşmak isleýänlere möhüm ekoulgam hökmünde tokaýlary beýan etmek arkaly plakatlary ýa-da beýleki çap materiallaryny taýýarlamak teklip edilýär. Bäsleşige hödürlenilýän işler şeýle hem ýerleri dikeltmekde we gurakçylyga garşy göreşmekde zenanlaryň we gyzjagazlaryň tagallalaryny hem açyp görkezip biler.
Plakatlaryň öz içine maglumat grafikasyny, tablisalary, fotosuratlary ýa-da suratlary alyp biljekdigini bellemelidiris. Işleri 10-njy iýula çenli undptm@gmail.com elektron poçtasyna ýa-da şu salga ugratmaly: Aşgabat ş. BMG-nyň binasy, Arçabil, 21.
Bäsleşigiň ýeňijilerine 2023-nji ýylyň 12-nji awgustynda Ýaşlar gününde sylaglar gowşurylar. Olar şeýle hem 21-nji martda bellenip geçilýän tokaýlaryň Halkara gününe bagyşlanan ekologiki çärä gatnaşmaga mümkinçilik alarlar.
Plakatlaryň bäsleşigi Türkmenistanyň tebigaty goramak Jemgyýeti, şeýle hem Tebigy kuwwat, Eko-durmuş we Ynanç wepa jemgyýetçilik guramalary bilen bilelikde geçirilýär. Ol BMG-nyň çölleşmäge garşy guramasy (UNCCD) tarapyndan badalga berilen #HerLand bütindünýä kampaniýasynyň bir bölegidir.
ORIENT habarlar
