Eýran we Özbegistan Türkmenistanyň üsti bilen üstaşyr daşama arkaly söwda dolanyşygyny artdyryp biler
Eýranyň Söwda, senagat, dag-magdan we oba hojalygy palatasynyň (ICCIMA) başlygy Golam-Huseýin Şafei Özbegistana Eýran bilen söwda gatnaşyklaryny giňeltmek üçin ulag meselesini Türkmenistanyň kömegi bilen çözmegi teklip etdi.
Ol ICCIMA-nyň şu ýyl üçin esasy maksadynyň Eýran bilen Özbegistanyň arasyndaky häzirki söwda dolanyşygyny 400 million dollardan 1 milliard dollara çenli ýokarlandyrmakdygyny aýtdy.
“Bu meselede käbir kynçylyklar bar, olaryň iň möhümi – ulag hyzmatdaşlygyny ösdürmek, esasanam demir ýol pudagynda. Bu iki ýurduň arasyndaky söwdanyň giňelmegine çynlakaý päsgelçilik döretmek bilen iki ýurduň hem söwdagärlerine uly ýitgi çekdirýär. Mesele üçünji ýurtlaryň hyzmatdaşlygynda, şol sanda Türkmenistany goşmak bilen çözülmese, ýagdaý şol durşuna galar” – diýip, Şafei aýtdy. Şeýle hem, ol iki tarapyň ykdysady operatorlaryny Demirgazyk-Günorta halkara üstaşyr geçelgesiniň taslamalaryna maýa goýmaga çagyrdy.
Bu barada şenbe güni ICCIMA-nyň ýolbaşçysy Özbegistanyň Prezidenti Şawkat Mirziýoýewiň Tährana sapary mynasybetli gurnalan eýran-özbek işewürlik forumynda aýtdy – diýip, Tehran Times habar berýär.
ICCIMA-nyň portalynyň berýän habaryna görä, foruma iki ýurduň ýokary derejeli işgärleri, şol sanda Eýranyň Senagat, dag-magdan senagaty we söwda ministri Abbas Ali-Abadi we Özbegistan Respublikasynyň Maýa goýum, senagat we söwda ministri Laziz Kudratow gatnaşdylar.
Bu çärä 50 özbek kompaniýasynyň wekilleri-de gatnaşdy.
ORIENT news
