Türkmenistanda zergärleriň arasynda bäsleşik geçirildi
Türkmenistanyň Kärdeşler arkalaşygynyň milli merkeziniň we Zenanlar birleşiginiň merkezi geňeşiniň guramagynda “Zerim bar, zergärim bar, bagtyýar zamanam bar” ady bilen ýurdumyzyň zergärleriniň arasynda bäsleşik geçirildi.
Döredijilik bäsleşiginiň maksady gadymdan gelýän milli zergärçilik sungatymyzy ýaş nesillere geçirmekden, ussat we ýaş zergärleri ýüze çykarmakdan ybarat boldy.
Bäsleşige ýurdumyzyň sebitlerinden we Aşgabat şäherinden zergärler we ýaş höwesjeňler, şol sanda dürli ugurda iş alyp barýan hünärmenler we talyp ýaşlar gatnaşdylar.
Bäsleşige gatnaşyjylar 3 şert boýunça bäslediler. Birinji şertde berlen 3 minudyň dowamynda zergärler ýaşaýan sebitlerinde ýörgünli bolan şaý-sepler, zergärçilik aýratynlyklary bilen ýygnananlary döredijilikli tanyşdyrdylar.
Ikinji şertiň düzgünlerine laýyklykda, zergärler ýerine ýetirilen bir aýdymyň dowamynda bir milli şaý-sep görnüşini taýýarladylar. Üçinji – jemleýji şertde bäsleşige gatnaşyjylar özleriniň ýerine ýetiren işleriniň 5-siniň aýratynlygyny we täzeçilligini döredijilikli beýan etdiler.
Bäsleşigiň ýeňijilerine şu gün – 16-njy iýunda paýtagtymyzda ýerleşýän Türkmenistanyň Jemgyýetçilik guramalarynyň merkezinde sylag gowşuryş dabarasy geçirildi. Ýurdumyzyň iň ussat zergärlerine Türkmenistanyň Kärdeşler arkalaşygynyň milli merkeziniň we Zenanlar birleşiginiň merkezi geňeşiniň hormat hatlary we gymmat bahaly sowgatlary dabaraly gowşuryldy.
ORIENT news
