Prezident Serdar Berdimuhamedow balkanly ekerançylar bilen duşuşdy
13-nji iýunda Prezident Serdar Berdimuhamedow Balkan welaýatynda iş saparynda bolup, sebitiň oba hojalykçylary bilen söhbetdeş boldy. Bu barada Türkmenistanyň Döwlet habarlar agentligi habar berýär.
Welaýatyň Gyzylarbat etrabynyň çägindäki galla meýdanynda Prezident Serdar Berdimuhamedow etrap tehniki hyzmat ediş kärhanasynyň mehanizatory S.Ödäýew, “Batly-Gadam” hususy kärhanasynyň ýolbaşçysy A.Amanmämmedow hem-de hususy kärhananyň ekerançylyk meýdanynyň daýhany G.Amanmyradow bilen söhbetdeş boldy.
Söhbetdeşlikde Prezident Serdar Berdimuhamedow iş şertleri, maşgala ýagdaýy we kärende ýerinde ösdürip ýetişdirýän ekinleriniň görnüşi hem-de galla meýdanlarynyň hasyllylygy bilen gyzyklandy. Telekeçi bilen bolan söhbetdeşlikde Türkmenistanyň Prezidenti Döwlet obasenagat toplumyna hususyýetçiligiň işjeň çekilmegi netijesinde öndürilýän önümleriň mukdarynyň artýandygyny kanagatlanma bilen belledi we telekeçileriň iş netijeliligini ýokarlandyrmak üçin olara döwletimiz tarapyndan zerur goldawlaryň yzygiderli beriljekdigini nygtady.
Prezident Serdar Berdimuhamedow oba ýerlerinde durmuş derejesiniň mundan beýläk-de ýokarlanmagy, daýhanlaryň öndürijilikli zähmeti we Oba milli maksatnamasyndan gelip çykýan wezipeleriň üstünlikli ýerine ýetirilmegi ugrunda döwletimiziň geljekde-de alada etjekdigini aýtdy.
ORIENT news
