Kolumbiýanyň jeňňelinde uçar heläkçiliginden 40 gün soň dört çaga diri tapyldy
40 gün ozal bolup geçen uly bolmadyk uçaryň heläkçiligi netijesinde ýitirim bolan dört çaga anna güni Kolumbiýanyň jeňňelliklerinde diri tapyldy. Bu barada şenbe güni, 10-njy iýunda Kolumbiýanyň Prezidenti Gustawo Petro öz twitterinde şeýle habar berdi.
“Tutuş ýurdumyz üçin şatlyk! 40 gün ozal Kolumbiýanyň jeňňelinde ýitirim bolan dört çaga diri bolup çykdy” - diýip, döwlet baştutany çagalaryň jeňňellikde diri galmak üçin başardyklaryça jan edendiklerini habar berýär.
“ Reuters” habarlar gullugynyň berýän habaryna görä, Ararakuara şäherinden San- Hose del Guawýare uçan Cessna 206 kysymly uçar 1-nji maýda jeňňelde heläkçilige uçrady. Netijede, uçarda bar bolan ulularyň üçüsi-de, şol sanda pilot we çagalaryň ejesi heläk boldy.
Doganlar - bir oglan we üç gyz harbylar tarapyndan uçaryň heläkçilige uçran ýerinden uzak bolmadyk ýerde tapyldy. Çagalaryň körpesi heläkçilik bolan pursatda heniz bir hem ýaşamandy, beýleki çagalar 4, 9 we 13 ýaşynda.
Petro çagalaryň bile bolandygyny, olaryň häzirki wagtda juda "gowşakdygyny" we lukmanlaryň gözegçiliginde saklanylýandygyny aýtdy.
Kolumbiýanyň Goranmak ministri Iwan Welaskes Gomes çagalaryň Bogotanyň Merkezi harby keselhanasynda saglyklaryny dikeldýändigini we olaryň ýagdaýlarynyň durnuklydygyny habar berdi.
Ol: “doganlaryň ulusy bolan gyzjagazyň "ýolbaşçylyk ukyby we edermenligi", şeýle-de "jeňňele beletligi" doganlaryň diri galmagyna kömek etdi” - diýdi.
Halas ediş işlerine Kolumbiýanyň goşunynyň we Harby howa güýçleriniň uçarlary we dikuçarlary gatnaşdyryldy. Halas edijiler gözleg itleriniň kömegi bilen ozal çagalaryň iýen miweleriniň galyndylaryny, şeýle hem bukulmak üçin emelleşdiren ýerlerini tapypdylar.
ORIENT news
