Serdar Berdimuhamedow Hindistanda bolup geçen otly heläkçiligi zerarly gynanç hatyny iberdi
Türkmenistanyň Prezidenti Serdar Berdimuhamedow Hindistan Respublikasynyň Prezidenti Draupadi Murmuwa we Premýer-ministri Narendra Modä Odişa ştatynda bolup geçen, köp sanly adam pidalaryna we şikes ýetmelerine getiren pajygaly otly heläkçiligi zerarly gynanç hatyny iberdi.
Döwlet Baştutanymyz şu agyr pursatda gurban bolanlaryň dogan-garyndaşlaryna, ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini beýan etdi, ejir çekenlere bolsa tiz wagtda sagalmaklary baradaky dileglerini aýtdy.
Hindi demirýollary ulgamynyň ýolbaşçylarynyň berýän maglumatyna görä, ýük otlusy bilen çaknyşmagy zerarly, Kalkuttadan Çennaýa barýan ýolagçy otlusynyň birnäçe wagony ýoldan çykyp, garşylykly ugurdaky ýola ýykylypdyr. Biraz wagtdan olar bilen başga bir ýolagçy otlusy çaknyşýar, netijede ýene-de birnäçe wagon ýoldan çykyp, berbat bolýar.
Soňky maglumatlar boýunça, heläkçilik zerarly 238 adam pida boldy, 900-den gowrak adam ýaralandy.
ORIENT news
