Türkmenistanda daşky gurşaw meselelerine bagyşlanan halkara forumlar geçiriler
Wise-premýer Annageldi Ýazmyradow anna güni Ministrler Kabinetiniň mejlisinde Türkmenistanda Bütindünýä daşky gurşaw gününe bagyşlanan iki halkara forumyň geçiriljekdigini habar berdi.
1972-nji ýylyň 5-nji iýuny BMG-niň Baş Assambleýasy tarapyndan Bütindünýä daşky gurşaw güni diýlip yglan edildi we bu ekologiýa baýramy her ýyl şu gün bütin dünýäde bellenilýär.
Daşky gurşawy goramak we halkara hyzmatdaşlygy boýunça ylmy-amaly maslahat Aşgabatda gibrid görnüşde geçiriler. Onuň işine degişli türkmen we daşary ýurt gurluşlarynyň wekilleri gatnaşarlar.
Merkezi Aziýada suw desgalarynyň durnukly ösmegi üçin suwy netijeli dolandyrmak meselelerine bagyşlanan ikinji forum Daşary işler ministrligi bilen bilelikde geçiriler. Simpoziuma Merkezi Aziýa sebitiniň ýurtlarynyň wekilleri gatnaşarlar. Wise-premýer Koreýa Respublikasynyň hünärmenleriniň foruma wideo aragatnaşyk arkaly gatnaşjakdygyny habar berdi.
ORIENT news
