Sungatyň çägi ýok: dürli ýurtlaryň diplomatlary Moskwadaky sergide öz nakgaş eserlerini görkezdiler
Portretler, natýurmortlar, peýzaž eserleri - Moskwada işleýän daşary ýurt diplomatik wekilhanalarynyň işgärleri tarapyndan ýerine ýetirilen jemi 150-den gowrak surat "Dünýä reňkleri" sergisinde sergilenýär. Sergi sişenbe güni Moskwanyň häzirki zaman sungaty muzeýinde açyldy. Ol Russiýanyň Daşary işler ministrligi bilen Moskwadaky diplomatik korpusyň wekili, Azerbaýjanyň ilçisi Polad Bülbül ogly tarapyndan bilelikde guraldy – diýip, TASS habar berýär.
Sergide dünýäniň dürli künjeklerinden: Afrika ýurtlarynyň, Latyn Amerikasynyň, Günorta-Gündogar Ýewropanyň, Ýakyn Gündogaryň we Günorta-Gündogar Aziýanyň ilçihanalarynyň we konsullyklarynyň diplomatlarynyň döredijilik işleri görkezilýär.
Sergä gelenler dürli žanrdaky sungat eserleri - žiwopis, grafika, art-obýekt, gadymy kalligrafiýanyň nusgalary we diplomatik wekilhanalaryndan ýer şarynyň ähli sebitlerini öz içine alýan milli senetleri bilen tanyşdylar. Guramaçylar bu taslamanyň "dürli ýurtlaryň, halklaryň, medeniýetleriň we däp-dessurlaryň wekilleriniň arasyndaky özara gatnaşyklaryň dowamly gymmaty" ideýasynyň çäginde durmuşa geçirilýändigini bellediler.
“Sungat häzirki zamanyň çalt aýlawynda ugur görkeziji şamçyragdyr. Diplomatik bellikler, habarlar we maglumatlar näçe mazmunly we wajyp bolsa-da, sungat eserleri käwagt söz bilen beýan edip bolmaýan zady aňlatmaga ukyplydyr. Diplomatlar diňe bir galam däl, eýsem çotgany hem ussatlyk bilen özleşdirenlerinde, bu iki esse ynandyryjy" – diýip, Russiýanyň Daşary işler ministriniň orunbasary Andreý Rudenko aýtdy.
ORIENT news
