Newadaky şäherde türkmen halysynyň sergisi geçiriler
Sankt-Peterburgdaky Russiýanyň etnografiýa muzeýinde 28-nji maýda Türkmenistanda her ýyl maý aýynyň soňky ýekşenbesinde bellenilýän Türkmen haly gününe bagyşlanan giň gerimli «Haly dünýäsi» dabarasy geçiriler.
Baýramçylyk çäresi «Russiýa nagyşlarda» etnik festiwalynyň çäginde geçiriler. Şol gün muzeý myhmanlary diňe bir ajaýyp türkmen halylary bilen çäklenmän, eýsem Russiýanyň, Moldowanyň, Baltika sebitiniň ýurtlarynyň haly önümleri we Russiýanyň etnografik muzeýiniň haly ammaryndaky ajaýyp eserleri bilen tanyşdyrar diýip, Peterburgyň Medeniýeti portaly habar berýär.
Baýramçylygyň myhmanlary üçin awtor gezelençleri, ussatlyk sapaklary we maglumat leksiýalary taýýarlandy. Mysal üçin, «Kawkazyň we Merkezi Aziýanyň halylary we haly önümleri» gezelençleri myhmanlara Kawkaz we Merkezi Aziýa halklarynyň medeniýetinde halyçylygyň iň möhüm orny barada gürrüň berer. Bu sebitlerde haly öndürmek hemişe umumy öý senetidi bolup, häzirki wagtda bu senet ýokary sungat derejesine ýetdi.
Halylaryň gözelligini gorap saklamak boýunça baý we dürli görnüşli leksiýa maksatnamasy halylary we onuň önümlerini saklamagyň düzgünleri barada gürrüň berer we adatça gelýänler üçin ýapyk bolan zyýankeşlere garşy göreş otagynda eksponatlary gaýtadan işlemek üçin ajaýyp enjamlar bilen tanyşdyrar.
Rus etnografiýa muzeýiniň haly ammarynyň emele gelşiniň taryhy hem az gyzykly bolmasa gerek. Myhmanlar seýrek eksponatlary we öndüriliş tehnikasyna görä has gyzykly bolan el halylary görerler hem-de dünýäde haly dokamagyň esasy merkezleri barada öwrenerler. Şekillendiriş setiri, muzeýiň surat arhiwindäki haly dokamak we ХХ asyryň başlarynda haly bilen bezelen interýerleri görkezýän seýrek suratlar doldurar.
ORIENT news
