"Magtymguly Pyragynyň doglan gününiň 300 ýyllygyny" bellemek dabarasy ÝUNESKO-nyň şanly seneleriniň sanawyna girer
ÝUNESKO 2024-2025-nji ýyllarda guramanyň Ýerine ýetiriji geňeşiniň 216-njy mejlisinde agza döwletler tarapyndan teklip edilen 46 sanly senäni bellemek dabarasyna gatnaşar. Bu sanawa Türkmenistan tarapyndan hödürlenen "Magtymguly Pyragynyň doglan gününiň 300 ýyllygy" hem goşular. Teklip Azerbaýjan, Belarus, Gazagystan, Gyrgyzystan, Türkiýe, Özbegistan we Ukraina tarapyndan goldanyldy. Bu barada Türkmen daşary syýasat edarasynyň saýtynda habar berilýär.
2024-nji ýylda Türkmenistan beýik akyldar hem şahyr Magtymgulynyň doglan gününiň 300 ýyllygyny giňden bellär. Baýramçylyk çäreleri halkara guramanyň gatnaşmagynda ýylyň tutuş dowamynda geçiriler.
Bu sanawa Türkmenistanyň beýleki ýurtlar bilen bilelikde teklip eden we goldan aşakdaky teklipleri hem girizilen:
Leksikograf we filolog Mahmud al-Kaşgari tarapyndan "Divan Lugat at-Türk" kitabynyň ýazylmagynyň 950 ýyllygy. ("Türk şiweleriniň ýygyndysy" 1074ý.). Wengriýanyň, Mawritaniýanyň, Marokkonyň, Kataryň we Täjigistanyň goldawy bilen Azerbaýjanyň, Gazagystanyň, Gyrgyzystanyň, Türkmenistanyň, Türkiýäniň we Özbegistanyň bilelikdäki teklibi;
Binagär Ajami Nakhiwaniniň doglan gününiň 900 ýyllygy (1125 ý. - XII asyryň ahyry). Türkiýäniň we Türkmenistanyň goldawy bilen Azerbaýjanyň teklibi;
Emir Unsura-al-Meali Keýkawus ibn-Iskender ibn-Kabus ibn-Wuşmagiriň doglan gününiň 1000 ýyllygy. Ermenistanyň, Täjigistanyň we Türkmenistanyň goldawy bilen Eýran Yslam Respublikasynyň teklibi;
Şahyr Parwina Etesaminiň (1907-1941) işjeň durmuşynyň 100 ýyllygy. Täjigistanyň we Türkmenistanyň goldawy bilen Eýran Yslam Respublikasynyň teklibi;
2023-nji ýylyň 24-nji maýynda ÝUNESKO-nyň Türkmenistan tarapyndan hödürlenen Magtymguly Pyragynyň golýazmalar ýygyndysynyň “Dünýä ýatlamasy” halkara sanawyna goşulandygyny ýatlatmak isleýäris.
ORIENT news
