Rumyniýada Türkmenistanyň Medeniýet günleriniň tamamlanmagy bilen taraplar bilim pudagyndaky hyzmatdaşlyga degişli resminama gol çekdiler
Şu günler Rumyniýanyň Konstanta şäherinde geçirilen we rumyn halkyna baý türkmen medeniýetini, onuň özboluşly dünýäsini açyp görkezen Türkmenistanyň Medeniýet günleri 25-nji maýda tamamlandy.
Medeni çäräniň çäklerinde rumyn şäherinde sergi, konsert, “Türkmenfilm” kinostudiýasynyň film görkezilişi, ylmy we bilim toparlarynyň wekilleri bilen duşuşyklar we başga-da birnäçe çäreler geçirildi.
Bu ýerde kitaplar, Magtymguly Pyragynyň goşgular ýygyndysy, şeýle hem Türkmenistanyň taryhyna, täsin tebigatyna we syýahatçylygynyň özüne çekijiligine bagyşlanan dürli ylmy-populýar edebiýatlar görkezildi.
Türkmen milli egin-eşikleri, öý goşlary, sungatyň we senetçiligiň özboluşly nusgalary ekspozisiýanyň esasy bezegi boldy. Saz gurallary, türkmen zergärleriniň dürlüligi we ajaýyplygy bilen tapawutlanýan nepis şaý-sepleri myhmanlarda uly gyzyklanma döretdi.
Konstantadaky Medeniýet günleri meşhur türkmen ýerine ýetirijileriniň, halk sazandalarynyň, opera we estrada aýdymçylarynyň, şeýle hem “Dokmaçylar” folklor toparynyň gatnaşmagynda döredijilik baýramçylygy bilen tamamlandy.
Aşgabatda Türkmenistanyň we Rumyniýanyň Bilim ministrlikleriniň arasynda gol çekilen bilim hyzmatdaşlygy maksatnamasy Rumyniýada geçirilen medeni çäreleriň jemleýji sözsoňy boldy.
Gol çekişme 26-njy maýda Türkmenistanyň Daşary işler ministrliginde türkmen tarapyndan Türkmenistanyň Bilim ministri Gurbangül Ataýewanyň, rumyn tarapyndan - Rumyniýanyň Aşgabatdaky Adatdan daşary we doly ygtyýarly ilçisi Ion Nawalyň gatnaşmagynda geçirildi.
ORIENT news
