Türkmenistanyň futbol boýunça ýygyndysynyň CAFA-2023 ýaryşynda geçirjek oýunlarynyň rejenamasy mälim boldy
Türkmenistanyň futbol boýunça ýygyndysynyň 10-njy iýundan 20-nji iýuna çenli Daşkentde (Özbegistan) we Bişkekde (Gyrgyzystan) geçjek CAFA Nations Cup 2023 toparlaýyn tapgyrynyň çäklerindäki oýunlarynyň rejenamasy mälim boldy.
Türkmen topary Özbegistanyň, Omanyň we Täjigistanyň ýygyndylary bilen A toparyny düzüp, öz oýunlaryny Daşkentde geçirer.
Türkmenistanyň ýygyndysy birinji oýny 11-nji iýunda Täjigistanyň toparynyň garşysyna geçirer. Soňra 14-nji iýunda Oman bilen duşuşar, 17-nji iýundaky oýny bolsa Özbegistanly bäsdeşleri bilen oýnar.
Şol bir wagtda Bişkekde B toparynyň ýygyndylarynyň oýunlary geçer, ol ýerde:
Gyrgyzystan — Owganystan, 10-njy iýunda;
Eýran — Owganystan, 13-nji iýunda;
Gyrgyzystan — Eýran, 16-njy iýunda bolar.
Reglamente laýyklykda toparlaýyn tapgyrda oýunlar aýlaw ulgamy boýunça bir aýlawda geçiriler. Iki toparyň ýeňijileri finalda duşuşarlar. Öz kwartetlerinde ikinji bolan toparlar bolsa üçünji ýer ugrunda göreşerler.
ORIENT habarlar
