Aşgabatda gruzin minankarisiniň sergisi açyldy
Paýtagtymyzdaky Şekillendiriş sungaty muzeýinde gruzin ussatlarynyň şaý-sepleriniň minankari sergisi açyldy. Çäre Gruziýanyň Aşgabatdaky ilçihanasy we Türkmenistanyň Medeniýet ministrligi tarapyndan guraldy.
Çäräni Türkmenistanyň Medeniýet ministri Atageldi Şamyradow açdy we hoş geldiňiz sözleri bilen çykyş etdi. Türkmenistan bilen Gruziýanyň netijeli özara hyzmatdaşlygy giňeltmek üçin möhüm ädimleri ädýändigini belläp, ol şuňa meňzeş çäreleriň geçirilmeginiň ikitaraplaýyn gatnaşyklary mundan beýläk-de işjeňleşdirmegiň guraly hökmünde wajypdygyny nygtady.
Gruziýanyň Türkmenistandaky ilçisi Konstantin Sabiaşwili özüniň giriş sözünde şeýle diýdi:
«Bu sergi Aşgabatda ilkinji gezek geçýär. Bu günki çäre Gruziýa bilen Türkmenistanyň arasynda giň ikitaraplaýyn dialogy ösdürmek üçin örän möhümdir. Ekspozisiýa gadymy minankari sungatyny ösdürmegi dowam etdirýän dokuz gruzin ussatlarynyň işlerini öz içine aldy».
Gruzin dilinde emalyň tehnikasyna minankari diýilýär. Iň irki belli artefaktlar VIII-IX asyrlara degişlidir, tehnikanyň özi bolsa gadymy Wizantiýanyň ussatlaryndan görlüp alnandyr.
Minankari sungaty Gruziýada XV asyra çenli ösüpdir, soňra bolsa ýitipdir. Birnäçe onýyllyklar mundan ozal sungat işgärleri emalçy ussalaryň kömegi bilen saklanyp galan resminamalary we artefaktlary ulanyp, bu seneti gaýtadan dikeldipdirler.
Paýtagtymyzdaky Şekillendiriş sungaty muzeýindäki ekspozisiýa elde ýerine ýetilen ajaýyp awtorlyk şaý-seplerini (zergärçilik önümlerini) — dürli äheňde ýerine ýetirilen broşkalary, gulakhalkalary, bilezikleri, kulonlary, ýüzükleri, şeýle hem amaly-haşam sungatynyň işlerini öz içine aldy.
Gruzin emalynyň tapawutlandyryjy häsiýetleri batga we şerap reňkleriniň, ýaşyl we gyzyl reňkleriň dürli öwüşginleriniň ulanylmagydyr. Sergi 21-nji maýda hem öz işini dowam etdirer.
ORIENT habarlar
