FIFA-nyň sebitleýin wekili Türkmenistana geler
FIFA-nyň sebitleýin tehniki utgaşdyryjysy Gaýoz Darsadze (Gruziýa) 17-19-njy maýda iş sapary bilen Türkmenistana geler.
Türkmenistanyň Futbol federasiýasynyň resmi saýtynyň habar bermegine görä, iki günlük saparyň dowamynda FIFA-nyň sebitleýin tehniki maslahatçysy guramanyň ýolbaşçylary we tehniki bölümiň hünärmenleri bilen 2023-nji ýyldan 2026-njy ýyla çenli Türkmenistanda göz öňünde tutulan FIFA-nyň zehinlerini ösdürmek taslamasyny, şeýle hem hyzmatdaşlygyň geljegini ara alyp maslahatlaşar.
Maksatnama badalga berilmeginiň sebäbi FIFA-nyň bilermenleri tarapyndan ýerli birleşmelerde ätiýaçlygy terbiýelemegiň infrastrukturasynyň we usulyýetiniň seljermesiniň geçirilmegidir. Şunda taslamany bar bolan şertleri, sport däpleri, ösüşiň ugurlaryny we milli mentaliteti göz öňünde tutup ýerine ýetirmekligiň meýilleşdirilýändigi möhüm faktor bolup durýar.
ORIENT habarlar
