Türkmenistanda Konstitusiýanyň we Döwlet baýdagynyň güni bellenildi
Penşenbe güni Türkmenistanda Konstitusiýa we Döwlet baýdagynyň güni mynasybetli baýramçylyk çäreleri geçirildi.
Konstitusiýa binasyna we Baş baýdaga gül goýmak dabarasyna Milli liderimiz Gurbanguly Berdimuhamedow, Hökümet agzalary, Mejlisiň, ministrlikleriň, pudaklaýyn dolandyryş edaralarynyň, ýurdumyzda hereket edýän halkara guramalaryň, diplomatik wekilhanalaryň ýolbaşçylary, hormatly ýaşulular, jemgyýetçilik guramalarynyň, köpçülikleýin habar beriş serişdeleriniň wekilleri, paýtagtymyzyň myhmanlary we ýaşaýjylary gatnaşdylar.
Soňra dabaralar paýtagt "Parahat-7" häzirki zaman ýaşaýyş jaý toplumynda dowam etdi, bu ýerde baýramçylyk mynasybetli otaglarynyň ýerleşişi gowulandyrylan köp gatly ýaşaýyş jaýy açylyp, ulanylmaga berildi.
Konstitusiýanyň we Döwlet baýdagynyň güni mynasybetli Mary welaýatynyň dolandyryş merkezinde Türkmenistanyň Senagatçylar we telekeçiler birleşmesiniň agzasy bolan hususy kärhana tarapyndan gurlan täze dermanhana açyldy.
Paýtagtyň Kongresler merkezinde medeniýet işgärleriniň baýramçylyk konserti geçirilip, milli teleradio ýaýlymlar arkaly köpçülige ýetirilen sungat ussatlarynyň aýdym-saz we tans çykyşlary türkmenistanlylar we ýurduň myhmanlary üçin ajaýyp sowgat boldy.
ORIENT news
