Serdar Berdimuhamedow we Si Szinpin Hytaýda Türkmenistanyň Medeniýet ýylyny geçirmegi maslahatlaşdylar
Indiki, 2024-nji ýylda Hytaýda Türkmenistanyň Medeniýet ýyly geçiriler. Beýleki çäreler bilen bir hatarda ol, türkmen akyldary we şahyry Magtymguly Pyragynyň 300 ýyllygynyň bellenilmegini hem öz içine alar. Prezidentimiz Serdar Berdimuhamedowyň şu ýylyň ýanwar aýynda Hytaýa eden döwlet saparynda gazanylan bu ylalaşyklar, iki döwletiň Baştutanlarynyň Sian şäherinde geçirilen gepleşiklerinde ýene-de üns merkezinde boldy.
Serdar Berdimuhamedow we Hytaýyň Prezidenti Si Szinpin ýangyç, energetika, ulag we kommunikasiýa ýaly möhüm ugurlardan başga-da medeni we ynsanperwer hyzmatdaşlygyň ähmiýetine aýratyn üns berdiler.
Şeýle hem, saglygy goraýyş, şol sanda adaty hytaý lukmançylygy we innowasiýa tehnologiýalary pudagynda özara gatnaşygyň giňelýändigini bellediler. Sport pudagy hem ünsden düşmedi.
Prezidentimiz Serdar Berdimuhamedow 19-njy maýda «Hytaý-Merkezi Aziýa sammitine» gatnaşar.
ORIENT news
