Türkmenistanyň Prezidenti ýangyç we energetika toplumy boýunça wise-premýeri täzeledi
Prezident Serdar Berdimuhamedow Aşyrguly Begliýewi başga işe geçmegi sebäpli Ministrler Kabinetiniň Başlygynyň orunbasary wezipesinden boşatdy.
Döwlet Baştutany “Türkmengaz” döwlet konserniniň ozalky başlygy Batyr Amanowy ýangyç we energetika toplumyna jogapkär premýer-ministriň orunbasary wezipesine belledi.
Döwlet baştutany bu karary şenbe güni Ministrler Kabinetiniň nobatdaky mejlisinde yglan etdi.
Aşyrguly Begliýew 2023-nji ýylyň fewralyndan bäri premýer-ministriň orunbasary bolup işledi, ondan ozal, 2022-nji ýylyň aprelinden bäri Türkmenistanyň Prezidentiniň nebit we gaz meseleleri boýunça geňeşçisi wezipesini ýerine ýetirdi. 2015-nji ýyldan 2017-nji ýyla çenli “Türkmengaz” DK ýolbaşçylyk etdi.
Batyr Amanow 2020-nji ýylyň iýul aýynda “Türkmengaz” DK başlygy wezipesine bellendi. Ondan ozal ol Türkmenbaşynyň nebiti gaýtadan işleýän zawodlar toplumynyň baş müdiri we nebit-gaz pudagynda beýleki wezipelerde işledi.
Şu wagta çenli “Türkmengaz” DK başlygynyň orunbasary wezipesini ýerine ýetiren Maksat Babaýew konserniň başlygy wezipesine bellendi. Ondan ozal 2017- nji ýylda Babaýew “Türkmengaz” DK ýolbaşçylyk edipdi, 2018-nji ýylyň apreline çenli Ministrler Kabinetiniň başlygynyň nebit we gaz boýunça orunbasary bolup işledi.
ORIENT news
