Türkmen folklor kollektiwi — Azerbaýjandakyt halkara festiwalynda iň gowysy boldy
Türkmenistandan «Laçyn» folklor kollektiwi Azerbaýjanyň Şuşa şäherinde geçirilen «Harybülbül» halkara festiwalynda çykyş eden iň gowy topar boldy. Bu barada şu gün resmi türkmen metbugaty ýazýar.
Topar tarapyndan ýerine ýetirilen «Küştdepdi» we «Bilezik» türkmen halk aýdymlary artistleriň däp bolup gelýän lybaslary bilen utgaşyklykda bäsleşigiň eminlerinde uly täsir galdyrdy. «Laçyn» şeýle hem beýleki ýurtlardan — Gyrgyzystandan, Gazagystandan, Özbegistandan, Türkiýeden, Azerbaýjandan gelen kollektiwler bilen bilelikde çykyş etdi.
Sahnada görkezilen ussatlyklary bilen aýdymçylar Öwezgeldi Amanow, Bahargül Ezizowa, Maýsagül Eminowa tapawutlandylar, olar festiwalyň hormatly diplomlaryna mynasyp boldular.
Türkmenistanyň sungatda at gazanan işgäri Maýsagül Eminowanyň «Laçyn» folklor toparynyň çeper ýolbaşçysydygyny belläp geçmelidiris. Onuň ýerine ýetirmeginde «Köne güzer», «Ogulbeg», «Maral geldi» atly türkmen halk aýdymlary ýaňlandy. Öz gezeginde, çäräniň ýapylyşynda Mansur Şaripow «Gel Türkmenistana» kompozisiýasy bilen çykyş etdi.
«Harybülbül» halkara saz festiwaly Geýdar Aliýew Gaznasynyň we Azerbaýjanyň Medeniýet ministrliginiň goldaw bermeginde 9-njy maýdan 11-nji maýa çenli geçdi. Festiwalyň baý maksatnamasy konsertleri, sergileri, filmleriň görkezilişlerini, şeýle hem dürli prezentasiýalary öz içine aldy.
Şuşa şäheri türk medeniýetiniň Halkara guramasy tarapyndan (TÜRKSOÝ) 2023-nji ýylda türki dilli dünýäniň medeni paýtagty diýlip yglan edildi.
ORIENT habarlar
