Türkmenistanyň we Täjigistanyň Baştutanlary Dusti etrabynda mekdebiň gurluşygyna başladylar
Türkmenistanyň Prezidenti Serdar Berdimuhamedow we Täjigistan Respublikasynyň Prezidenti Emomali Rahmon çarşenbe güni Hatlon welaýatynyň Dusti etrabynda täze mekdebiň gurluşygynyň düýbüni tutmak dabarasyna uzakdan gatnaşdy.
Bilim pudagynyň wekilleri we etrap aktiwistleri 540 orunlyk mekdebiň gurluşyk meýdançasyna ýygnandylar. Wideo köprüsiniň kömegi bilen döwlet Baştutanlary Magtymgulynyň adyny göterjek orta bilim edarasynyň gurluşygyna başladylar.
Mekdep, Dusti etrabynyň «Ergaş Soltanow» daýhan birleşiginde ýerli kompaniýa – «Döwlet Gurluşyk» HJ-i tarapyndan Türkmenistanyň hökümeti tarapyndan bölünip berlen serişdeleriň hasabyna gurlar.
Gurluşyk ministrliginde ORIENT-e gürrüň berilmegine görä, «Döwlet Gurluşyk» HJ-i desganyň gurluşyk meýdançasynda topografiki gözlegleri, inženerlik we geologiki gözlegleri amala aşyrýan Täjigistanyň «Halton-Loihasoz» JÇJ-i bilen taslama işleri üçin şertnama baglaşdy. Häzirki wagta çenli bu ýerde gurluşyk meýdançasynyň çägine germew edildi, wagtlaýyn ofisler we ammarlar oturdyldy, dik meýilnamalaşdyryş işleri tamamlandy, toprak getirildi we tekizlendi, binanyň binýat çukury taýýarlandy.
Desganyň buýrujysy bolup Türkmenistanyň Täjigistandaky ilçihanasy çykyş edýär.
ORIENT news
