Birinjiligi eýeläp bilerdi: Türkmen agyr atletikaçysy Aziýa çempionatynda bürünç medala mynasyp boldy
Türkmen ştangaçysy Bunýad Raşidow Çinju şäherinde (Günorta Koreýa) geçirilýän Aziýa çempionatynda bürünç medala mynasyp boldy.
Reşidow 67 kilograma çenli agram derejesinde ştangany silkip götermekde hormat münberiniň üçünji basgançagyny eýeledi. Birinji tälimiň netijeleri boýunça türkmen agyr atletikaçysy hindi türgeni Jeremi Lalrinnungdan (141 kg) we hytaýly Ýuejiden (147 kg) asgyn gelip, üçünji (140 kg) orna mynasyp boldy.
Ýöne itekläp götermekde Bunyad bäşinji netijäni görkezmek bilen (162 kg) iň soňky bäşinji orny (302 kg) eýeledi.
― Men bürünç medal bilen doly kanagatlanýaryn, ýöne has köpräk agramyň hötdesinden geljegimi duýýan. Günorta Koreýa uçmazdan ozal, biz Gruziýada otuz günlük okuw türgenleşiklerini geçdik, şonda meniň netijelerim – itekläp götermekde – 170 kilograma, silkip götermekde - 150 kilograma deň boldy. Şu günem edil şolar ýaly itekläp we silkip göteren bolsam, birinji bolup bilerdim. Geljekde geçiriljek ýaryşlarda çykyşymy gowulaşdyrmaga we altyn medal getirjek netijäni görkezmäge synanyşaryn - diýip, Bunýad Raşidow ORIENT-e aýtdy.
5-nji maýda badalga alan agyr atletika boýunça Aziýa çempionaty dünýäniň 37 ýurdundan 400 töweregi türgeni ýygnady.
Türkmen tarapyna 16 agyr atletikaçy (9 erkek we 7 zenan) wekilçilik edýär.
Yklym birinjiligi 2024-nji ýylda geçiriljek Olimpiýa oýunlarynyň öňüsyrasyndaky saýlama ýaryşlardyr. Ol 13-nji maýda tamamlanar.
ORIENT news
