Türkmenistan ynsanperwerlik kömegi hökmünde lukmanlary we lukmançylyk serişdelerini Owganystana ugradar
Maý 08, 2023 | 12:31 |9738
Türkmenistan Owganystanyň Gerat welaýatynyň Turgundy şäherçesine ýerli çaga dogrulýan hassahanasyna bejeris-maslahat beriş goldawyny bermek üçin derman we lukmançylyk serişdelerini, şeýle hem lukmanlary ugradar – diýip, TDH habar berýär.
Bu baradaky buýruga Türkmenistanyň Prezidenti Serdar Berdimuhamedow gol çekdi.
Resminama laýyklykda, Saglygy goraýyş we derman senagaty ministrligine, Oba hojalyk we daşky gurşawy goramak ministrligine, Dokma senagaty ministrligine lukmançylyk maksatly serişdeleri, harytlary hem-de azyk önümlerini ynsanperwerlik kömegi hökmünde Owganystana muzdsuz bermek tabşyryldy.
Goňşy ýurda hünärmenleri ugratmak we degişli ýükleri gowşurmak üstümizdäki ýylyň maý aýynyň dowamynda amala aşyrylar.
ORIENT habarlar
