Türkmen gümrükçileri töwekgelçilikleri dolandyrmak boýunça daşary ýurt tejribesini öwrenýärler
Gümrük töwekgelçiliklerini dolandyrmak, düzgün bozmalara garşy göreşmek we gümrük işleriniň awtomatlaşdyrylmagy babatyndaky milli seminar Merkezi Aziýada serhetleriň dolandyrylmagyna ýardam etmek Maksatnamasy (BOMKA 10) tarapyndan USAID-iň MA-da söwda Maksatnamasy bilen hyzmatdaşlykda geçirildi.
Okuwyň barşynda oňa gatnaşyjylary Gazagystanyň töwekgelçilikleri dolandyrmak ulgamyny gümrük resmileşdirmesi we gözegçilik işine birikdirilmegi, maglumatlary amatlaşdyrmak babatyndaky tejribesini öwrendiler. Olar şeýle hem Bütindünýä söwda guramasynyň söwda amallaryny ýönekeýleşdirmek baradaky Ylalaşygy boýunça borçnamalaryň ýerine ýetiriliş tejribesine hem garap geçdiler. Bu jähtde Gazagystanyň Maliýe ministrliginiň döwlet girdejileri Komitetiniň bilermenleri Türkmenistanda gümrük töwekgelçiliklerini dolandyrmagyň häzirki ulgamyny ösdürmek boýunça maslahatlary taýýarladylar.
Çäre BOMKA 10 Maksatnamasynyň «Kanuny söwda akymlarynyň araçäkden geçmegine ýardam etmek» 3-nji Düzüm böleginiň we USAID-iň Merkezi Aziýada söwda Maksatnamasynyň «Gümrük we serhet düzgünleriniň sazlaşdyrylmagy» atly 1-nji Komponentiniň çäklerinde gurnaldy, olar sebitleýin ykdysady integrasiýa prosesslerini mundan beýläk hem goldamaga we kanuny söwda akymlaryna goldaw bermäge gönükdirilendir.
Töwekgelçilikleri dolandyrmak ulgamy gümrük gözegçiliginiň netijeliligini üpjün etmäge, töwekgelçiligiň ýokary derejede bolan ugurlaryna ünsi gönükdirmäge, şeýle hem gümrük araçäginden geçmegi tizleşdirmek we ýönekeýleşdirmek üçin şertleri döretmäge gönükdirilendir.
ORIENT habarlar
