Türkmenistanda ÝÖTB-nyň «Türkmenistanyň zenan telekeçileri üçin halypalyk mekdebi-2023» atly taslamasy başlandy
Duşenbe güni Aşgabatda Ýewropanyň Ösüş we Täzeleniş Bankynyň «Türkmenistanyň zenan telekeçileri üçin halypalyk mekdebi-2023» atly taslamasy öz işine başlady. Ol Ýewropa Bileleşiginiň goldawy bilen «Işewür zenanlar» maksatnamasynyň çäginde geçirilýär.
Çäräniň resmi bölegine ÝB-niň Türkmenistandaky ilçisi Diego Ruiz Alonso, şeýle hem halkara hünärmenleri, bu maksatnamanyň bir ýyldan gowrak wagt bäri durmuşa geçirilýän ýeri Gazagystandan we Gyrgyzystandan tälimçiler we halypalar (zenan telekeçiler) gatnaşdylar.
Mekdep, işini ösdürmekde netijeleri gazanmaga höwesli we şahsy üýtgeşmelere hem-de işdäki üýtgeşmelere taýýar zenanlar üçin niýetlenendir. Taslama şertli ýagdaýda iki tapgyra bölünip bilner: halypalar ulgamynyň işjeňleşmegi hem-de zenan telekeçileriň – halypalar toparynyň döredilmegi.
Taslama 15 halypa we 30 mugallym gatnaşýar. Iki aýyň dowamynda olar gibrid görnüşde okuw geçirerler: sapaklar oflaýn we onlaýn görnüşde berilýär. Halkara hünärmenler öz tejribelerini ýerli halypalar bilen paýlaşarlar, olar hem öz gezeginde tälimçiler bilen jübütde işlärler.
Bu maksatnama Ýewraziýa işewürlik we telekeçilik mekdebi tarapyndan amala aşyrylýar. Taslama zenan telekeçilere täze iş mümkinçiliklerine we bilimlere ýol açar, işewür toparlarynyň beýleki wekilleri bilen tejribe alyşmaga we degişli teklipleri taýýarlamaga mümkinçilik döreder.
ORIENT news
