Kiýewiň politehniki instituty Türkmenistandan talyplary çekmäge gyzyklanýar
Türkmenistanyň Ukrainadaky ilçisi Toýly Ataýew Igor Sikorskiý adyndaky Kiýewiň politehniki institutynyň Halkara bilim merkeziniň direktory Sergeý Maulik bilen bilim babatyndaky hyzmatdaşlygy ara alyp maslahatlaşdy – diýip, Türkmenistanyň Kiýewdäki diplomatik wekilhanasy habar berýär.
Merkeziň baştutany Ukrainanyň ýokary okuw mekdebiniň tehniki hünärler boýunça ýokary derejeli hünärmenleri taýýarlamak üçin Türkmenistandan talyplary çekmäge taýýardygyny beýan etdi. Bu jähtde Türkmenistanda nebit-gaz toplumynyň ösüşiniň doly depginde gidýändigi, munuň daşary ýurt tejribesini ulanmaga uly isleg döredýändigi bellendi.
Türkmen diplomaty Aşgabadyň öz talyplaryny biolukmançylyk, uçar tehnikasy, himiki tehnologiýalar, informatika, saglygy goraýyş we ş.m. ugurlardan okatmaga gyzyklanýandygyny sözüniň üstüne goşdy.
Türkmenistanyň ilçihanasynyň binasynda geçen söhbetdeşligiň jemleri boýunça taraplar türkmen talyplaryny ukrain ýokary okuw mekdeplerinde okatmaga ikitaraplaýyn gyzyklanma bildirdiler.
ORIENT habarlar
