Gazagystan Owganystan bilen söwdany ep-esli artdyrmagy meýilleşdirýär
Gazagystanyň hökümetiniň başlygynyň orunbasary Serik Žumangarin Gazagystanyň Owganystan bilen söwda gatnaşyklaryny ösdürmek baradaky meýilnamalaryny beýan etdi. Bu barada sişenbe güni geçen gazak hökümetiniň mejlisiniň barşynda belli boldy – diýip, Amu.tv habar berýär.
«Biz söwda hyzmatdaşlygyny ösdürmegi meýilleşdirýäris. Ol ýere bugdaýy, uny, ösümlik ýagyny (Owganystana) üpjün etmek üçin hakyky geljek bar. Biz näme üçin bu mümkinçilikden ýüz döndermeli?» — diýip, Žumangarin beýan etdi. Mundan başga-da, ýerli işewürlik-jemgyýetler bilen tanyşmak we işi utgaşdyrmak üçin iki ýurduň bilelikdäki işewürlik-forumyny gurnamak meýilleşdirilýär. Häzirki wagtda Kabul bilen Astananyň arasyndaky haryt dolanyşygynyň $1 mlrd ABŞ-nyň dollaryna ýetendigi bellenýär.
Ozal Gazagystanyň Owganystandan diplomatik wekiliýeti kabul edendigi we Owganystanyň Gerat welaýatynda öz söwda wekilhanasyny açmaklygy meýilleşdirýändigi habar berlipdi.
ORIENT habarlar
