Seýrek we gymmatly kitaplary dikeltmek türkmen we amerikan alymlary tarapyndan amala aşyrylar
Iki ýurduň alymlary tarapyndan seýrek we gymmatly kitaplary dikeltmek we gorap saklamak boýunça bilelikdäki türkmen-amerikan taslamasyna gaýtadan badalga berildi. Seýrek neşirler we artefaktlar Türkmen milli golýazmalar institutynda saklanýar, onuň hünärmenleri ABŞ-nyň Kongres kitaphanasynyň bilermenleri bilen bilelikde dikeldiş işlerine gatnaşarlar.
Amerikanyň Türkmenistana gelen wekiliýetiniň düzümine Kitaplary goramak bölüminiň başlygy Ýasmin Han, Kitaplary goramak bölüminiň uly hünärmeni Tamara Oganýan we “Merrion & Smith” kompaniýasynyň baş müdiri William Bradford Smit girýär. Alymlar Aşgabatda birnäçe seminarlary, şeýle hem türkmen hünärmenleri bilen tejribe alyşmak üçin okuwlary geçirerler.
Türkmen döwlet medeniýet institutynyň kitaphanaçylyk fakultetiniň talyplary üçin ilkinji leksiýa 26-njy aprelde sagat 14:00-da geçiriler.
Türkmenistanda saklanýan seýrek kitaplary gorap saklamak boýunça taslama ABŞ-nyň Döwlet departamenti tarapyndan döredilen Ilçileriň Medeni mirasy goramak gaznasynyň (AFCP) goldawy bilen başlandy.
ORIENT news
