Türkmenistanyň we Özbegistanyň Prezidentleri hyzmatdaşlygyň geljegini ara alyp maslahatlaşdylar
Şenbe güni Türkmenistanyň Prezidenti Serdar Berdimuhamedow Özbegistanyň Prezidenti Şawkat Mirziýoýew bilen telefon arkaly söhbetdeşlik geçirdi.
Özbegistanyň lideri agyr ýitgi - enesi Ogulabat ejäniň aradan çykanlygy zerarly, Türkmenistanyň Prezidentine tüýs ýürekden gynanç we duýgudaşlyk bildirdi – diýip, Özbegistanyň Prezidentiniň metbugat gullugy habar berýär.
Taraplar Hökümetara komissiýasynyň ýakynda geçirilen mejlisiniň, Daşary syýasat edaralarynyň, ulag, medeniýet ministrlikleriniň ugry boýunça geçirilen duşuşyklaryň we Türkmenistan bilen Özbegistanyň gatnaşmagynda geçirilen beýleki çäreleriň oňyn netijelerine kanagatlanarly baha berdiler.
Söwda-ykdysady hyzmatdaşlyga, ilkinji nobatda Şawat-Daşoguz serhetýaka söwda zolagyny döretmek, ykdysadyýetiň ileri tutulýan pudaklarynda hyzmatdaşlyk taslamalaryny durmuşa geçirmek we işjeň medeni-gumanitar alyş-çalyşlary dowam etdirmek meselelerine aýratyn üns berildi.
Söhbetdeşligiň barşynda prezidentler türkmen-özbek gatnaşyklaryny has-da pugtalandyrmak we iň ýokary derejede gazanylan ylalaşyklara laýyklykda, amaly hyzmatdaşlygy giňeltmek meselelerini ara alyp maslahatlaşdylar.
Döwlet baştutanlary ýakyn wagtda geçirilmeli çäreleriň tertibine garadylar, bir-biregi ýetip gelýän Oraza baýramy bilen gutladylar we gowy arzuwlar etdiler.
ORIENT news
