Türkmenistanyň Daşary işler ministrliginiň başlygy BMG guramalarynyň ýolbaşçylary bilen duşuşyklar geçirdi
Türkmenistanyň Daşary işler ministrliginiň başlygy Ženewa iş saparynda birnäçe halkara guramasynyň ýolbaşçylary bilen duşuşyklar geçirdi. Hususan-da, BMG-nyň Baş sekretaryň orunbasary, BMG-nyň Ženewa bölüminiň baş müdiri Tatýana Walowa bilen geçirilen duşuşykda Türkmenistanyň Gurama bilen strategiki hyzmatdaşlygynyň köp sanly meselesi ara alnyp maslahatlaşyldy. Howpsuzlyk, ýarag ýaýratmazlyk düzgünine we ýaragsyzlanmak işine möhüm orun berildi.
Ministr Raşid Meredow halkara jemgyýetçiligi tarapyndan ykrar edilen hemişelik bitaraplyk statusyna eýe bolan ýurt bolmak bilen, Türkmenistanyň parahatçylygy we howpsuzlygy berkitmek ugrundaky tagallalaryň jemlenmegini goldaýandygyny aýtdy. Bu ugurdaky anyk ädimleri belläp, Türkmen Daşary işler ministrliginiň başlygy, Türkmenistanyň BMG-de öňe süren birnäçe möhüm halkara başlangyçlaryna ünsi çekdi.
Birnäçe ýyl ozal Aşgabatda geçirilen Merkezi Aziýada we Hazar sebitinde ýaragsyzlanmak boýunça halkara konferensiýanyň ähmiýeti bellendi. Taraplar şeýle hem maglumat pudagynda, halkara žurnalistleri taýýarlamak pudagynda hyzmatdaşlygy giňeltmek bilen baglanyşykly meseleleri jikme-jik ara alyp maslahatlaşdylar we bu ugurda bilelikdäki çäreleri görmek barada ylalaşdylar, - diýip Türkmenistanyň Daşary işler ministrliginiň habarynda aýdylýar.
Şeýle hem Türkmenistanyň Daşary işler ministri Baş sekretaryň orunbasary, Birleşen Milletler Guramasynyň Ýewropa Ykdysady Toparynyň ýerine ýetiriji sekretary Olga Algaýerowa bilen duşuşdy. Olar Türkmenistan bilen UNECE-iň arasyndaky hyzmatdaşlygyň ýagdaýyny we geljegini seljerip, durnukly energiýa, ulag, sanlylaşdyrma ýaly ugurlarda gepleşikleri güýçlendirmek boýunça çäreler barada ylalaşdylar.
Bütindünýä intellektual eýeçilik guramasynyň baş müdiri Daren Tang bilen geçirilen gepleşiklerde Raşid Meredow intellektual eýeçilik we degişli döwlet gurluşlarynyň işi boýunça milli derejede gazanylan amaly netijeler barada habar berdi.
Taraplar, Türkmenistanyň WIPO akademiýasy bilen hyzmatdaşlygy, Türkmenistanyň intellektual eýeçilik pudagyndaky halkara hukuk aktlaryna goşulmagy we milli kanunçylykda durmuşa geçirilmegi baradaky teklipleri taýýarlamak maksady bilen «ýol kartasyny» taýýarlamak barada ylalaşdylar.
ORIENT news
