Türkmenistanyň we ABŞ-nyň diplomatik edaralary howpsuzlyk pudagyndaky hyzmatdaşlygy ara alyp maslahatlaşdylar
Sişenbe güni Türkmenistanyň Daşary işler ministriniň orunbasary Wepa Hajyýew we ABŞ-nyň Döwlet sekretarynyň ýaraglara gözegçilik, barlamak we ylalaşyk boýunça kömekçisi Mellory Stýuart telefon arkaly söhbetdeşlik geçirdi.
Diplomatlar dürli halkara we sebit guramalarynyň arasynda howpsuzlyk hyzmatdaşlygyny ara alyp maslahatlaşdylar hem-de ynam we howpsuzlygy berkitmek boýunça 2011-nji ýyldaky Wena resminamasyny durmuşa geçirmek işine aýratyn üns berdiler, - diýip Türkmen Daşary işler ministrliginiň metbugat beýanatynda aýdylýar.
«Iki taraplaýyn duşuşyklar arkaly bu şertnamany durmuşa geçirmek boýunça gepleşikleri güýçlendirmegiň, ýöriteleşdirilen seminarlary we okuwlary guramak arkaly hünärmenleriň mümkinçiliklerini pugtalandyrmagyň möhümdigi bellenildi», - diýip habarda aýdylýar.
– Taraplar häzirki zaman kynçylyklaryna we howplaryna netijeli garşy durmagyň zerurdygyny bellediler, şeýle hem ýarag gözegçiliginde we bu ugurda halkara borçnamalarynyň ýerine ýetirilmeginde ynam döretmek çärelerini güýçlendirmek boýunça serişdelere garadylar, - diýip edarada nygtadylar.
Waşingtonda 17-nji aprelden 20-nji aprel aralygynda Demirgazyk Atlantik bileleşiginiň ýaraglara gözegçilik, ýaragsyzlanmak we köpçülikleýin ýok ediş ýaraglaryny ýaýratmazlyk boýunça 18-nji ýyllyk konferensiýasyny geçirýär. Demirgazyk atlantik bileleşiginiň baş sekretary Ýens Stoltenberg 18-nji aprelde gatnaşyjylara gutlag sözi bilen çykyş eder.
ORIENT news
