Türkmenistanyň DIM HGI daşky gurşawy goramagyň Bütindünýä gününe bagyşlap bäsleşik yglan etdi
Türkmenistanyň Daşary işler ministrliginiň Halkara gatnaşyklary instituty 10-11 synp okuwçylarynyň arasynda 5-nji iýunda bellenip geçilýän daşky gurşawy goramagyň Bütindünýä güni mynasybetli bäsleşik yglan edýär – diýip, ýokary okuw mekdebiniň saýtynda habar berilýär.
Ýurduň ähli welaýatlarynda we paýtagtda geçiriljek bäsleşik DIM HGI-y tarapyndan orta mekdepleriň ekologiýa boýunça kitaplarynyň, şeýle hem Gurbanguly Berdimuhamedowyň «Türkmenistan Durnukly ösüşiň maksatlaryna ýetmegiň ýolunda» kitabyndan düzülen soraglar esasynda geçiriler.
Okuwçylar 100 minudyň dowamynda test görnüşinde düzülen 100 soraga özbaşdak jogap bermeli.
Gatnaşmak üçin okuwçylar 2023-nji ýylyň 12-nji maýyna çenli www.iirmfa.edu.tm saýtynda hasaba alynmaly. Bäsleşigiň özi 17-nji maýda sagat 10:00-da geçiriler. Ol birwagtda ýurduň ähli welaýatlarynda başlanar. Adalatly bäsleşigi üpjün etmek üçin gatnaşyjylara internete elýeterliligi bolan kameranyň üsti bilen gözegçilik ederler.
Ballaryň iň köpüsini alan ýeňijileriň üçlügi DIM HGI-nyň we BMG-niň Türkmenistandaky wekilhanasynyň diplomlaryna we ýadygärlik sowgatlaryna eýe bolarlar.
Geçirilýän ýeri:
— Aşgabat şäheri we Ahal welaýaty — Türkmenistanyň DIM-niň Halkara gatnaşyklary instituty;
— Balkan welaýaty — Ýagşygeldi Kakaýew adyndaky Nebit we gaz halkara uniwersitetiniň şahamçasy;
— Daşoguz welaýaty — Türkmen oba hojalyk instituty;
— Lebap welaýaty — S.Seýdi adyndaky Türkmen döwlet mugallymçylyk instituty;
— Mary welaýaty — Türkmenistanyň Döwlet energetika instituty.
ORIENT habarlar
