Russiýadan Türkiýä gämi bilen ynsanperwer kömegi geldi
Türkiýäniň günorta-gündogarynda bolup geçen fewral ýer titremelerinde ejir çekenler üçin Gara deňiz kenaryndaky Unye portuna Russiýadan gämi bilen ynsanperwer kömegi geldi.Bu barada ýerli häkimiýetlere salgylanýan Anadolu agentligi habar berdi.
"Türkiýäniň Gara deňiz kenarýakasyndaky Unye portuna Russiýadan 184 tonna ynsanperwer kömegi bilen "Evrim Group" konteýner gämisi düşledi. Soçiden gelen gämi fewral aýynda bolup geçen, merkezi Kahramanmaraşa düşen weýrançylykly ýer titremelerinde ejir çekenlere azyk getirdi" – diýip, agentlik habar berýär.
Ynsanperwer kömeginiň bir tapgyry düşürildi we Türkiýäniň Adatdan daşary ýagdaýlaryň kynçylyklaryny ýeňip geçmek boýunça dolandyryş gullugynyň (AFAD) gözegçiligi astynda betbagtçylyk zolagyna iberildi.
7,7 we 7,6 ball ululykda ýer titremeleri 6-njy fewralda Türkiýäniň günorta-gündogaryndaky Kahramanmaras welaýatynda dokuz sagat aralykda bolup geçdi. Ýer sarsgynlary ýurduň 11 welaýatynda we goňşy döwletlerde, şol sanda Siriýada duýuldy. Türk häkimiýetleri ýer titremesini "asyryň betbagtlygy" diýip atlandyrdylar.
ORIENT news
