Gazak filmleri we seriallary Netflix platformasynda peýda bolup biler
Gazagystanyň maglumatlar we jemgyýetçilik ösüşi ministri Darhan Kydyrali Netflix-iň sebitleýin direktory Aleksandr Long bilen duşuşyk geçirdi, onuň barşynda gazak filmlerini bu platformada ýerleşdirmegiň mümkinçiligine garaldy.
«Kompaniýanyň uly mümkinçiliklerini göz öňünde tutup, men hyzmatdaşlygy ýola goýmaga gyzyklanma bildirdim. Biz geljekde Netflix-de gazak filmlerini alyp görkezmegi meýilleşdirýäris» - diýip, ministr özüniň Facebook sosial torundaky sahypasynda ýazdy.
Ministr soňky ýyllarda gazaklaryň öndüren filmleriniň we seriallarynyň öz hil derejesini ep-esli ýokarlandyrandygyny belledi – diýip, The Astana Times habar berýär.
Gazak kinematografynyň abraýynyň ýokarydygyny, aýratyn hem, ozalky sowet giňişliginde ýokarydygyny belläp geçmelidiris. «Watançylaryň wagty», «Gudalar», «Kwartirantlar», «Öýlenen sallah» we başga-da köp kinolentalar GDA ýurtlarynyň tomaşaçylarynyň söýgüli filmlerine öwrüldiler.
Öz gezeginde, Netflix striming hyzmaty filmleriň we seriallaryň tomaşa edilişiniň mukdary boýunça dünýäniň meşhur platformalarynyň biri bolup durýar. Kompaniýanyň dünýäniň 190 ýurdunda 230 mln-dan gowrak ýazylanlary bardyr.
2020-nji ýyldan bäri GDA-nyň tomaşaçylary üçin saýtyň rusça resmileşdirmesi bar.
ORIENT habarlar
