Türkmenistanyň Prezidentiniň Täjigistana sapary yza süýşürildi
“Türkmenistanyň Prezidenti Serdar Berdimuhamedowyň Täjigistana resmi sapary belli bir möhlete yza süýşürildi” – diýip, Täjigistan Respublikasynyň Prezidentiniň metbugat gullugyna salgylanýan «Asia-Plus» saýty şenbe güni habar berdi.
Saparyň Türkmenistanyň Döwlet Baştutanynyň enesi, Türkmenistanyň Halk Maslahatynyň Başlygy Gurbanguly Berdimuhamedowyň käbesi Ogulabat ejäniň aradan çykmagy sebäpli yza süýşürilendigi bellenilýär. Resmi sapar 10-11-nji aprele meýilleşdirilipdi.
Mundan başga-da, 8-nji aprele meýilleşdirilen Täjigistanyň we Türkmenistanyň Işewürler geňeşiniň ilkinji mejlisi, şeýle hem 9-njy aprele meýilleşdirilen iki ýurduň telekeçileriniň işewürlik forumy ýatyryldy.
Täjigistan Respublikasynyň Prezidenti türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa gynanç hatyny iberdi.
“ Siziň çuňňur hormatlanýan käbäňiz Ogulabat ejäniň aradan çykandygy baradaky habary uly gynanç bilen kabul etdim. Şu agyr ýitgi sebäpli dörän tüýs ýürekden çykýan gynanjymy kabul etmegiňizi haýyş edýärin. Şu agyr pursatda Size we Siziň ýakynlaryňyza sabyr-kanagat dileg edýärin” — diýip, Emomali Rahmon gynanç hatynda ýazýar.
ORIENT news
