Hünärmenler myhmanhanalary gurmakda Türkmenistanda ilkinji «ýaşyl» ölçegi teklip etdiler
Myhmanhanalaryň binasyny gurmak we ulanmak üçin Türkmenistanyň lkinji «ýaşyl» ölçeginiň garalamasyny BMGÖM-sy tarapyndan «Türkmenistandaky durnukly şäherler: Aşgabatda we Awazada ýaşyl şäherleri toplumlaýyn ösdürmek» taslamasynyň çäklerinde gurnalan iş duşuşygynyň barşynda hödürlediler.
Türkmenistanyň myhmanhana pudagynda ýaşyl ölçegleriň girizilmegi otellerdäki energiýa sarp edijiliginiň netijeliligini ýokarlandyrmaga we howanyň üýtgemegi boýunça Pariž ylalaşygynyň çäklerinde howanyň üýtgemegine garşy göreşmekde ýurduň tagallalaryna goşant goşmaklyga niýetlenendir.
Resminama Türkmenistanyň myhmanhanalarynyň we myhmanhana toplumlarynyň binasynda ýaşamak üçin ekologiki taýdan howpsuz şertleriň döredilmegini, durnukly gurluşygyň ýörelgelerine laýyklykda ýurtda myhmanhanalaryň we myhmanhana toplumlarynyň binalaryny bahalandyrmak boýunça «ýaşyl» ölçegiň girizilmegini göz öňünde tutýar.
Myhmanhanalaryň ýa-da myhmanhana toplumlarynyň binalarynyň «ýaşyl» derejesi öňdebaryjy halkara tejribäni göz öňüne tutup, on kriteriýa boýunça döredilendir. Ol kriteriýalara aşakdakylar girýär:
— gurşap alýan giňişligiň binagärligi we meýilleşdirilmegi,
— gurluşygy gurnamak we dolandyrmak,
— gurluşyk, timarlaýyş materiallarynyň we satyn almalaryň ekologiki taýdan arassalygy,
— binanyň we enjamlaryň energiýa netijeliligi,
— gaýtadan dikeldilýän çeşmelerden energiýa üpjünçiligi we parnik gazlarynyň zyňylmagy,
— suwdan netijeli peýdalanmak,
— suwuk we organiki galyndylaryň gaýtadan ulanylmagy,
— gurşap alýan çägiň abadanlaşdyrylmagy (bag ekilmegi),
— binany ulanmagyň howpsuzlygy,
— ýaşamagyň rahatlygy we hili.
«Türkmenistandaky durnukly şäherler: Aşgabatda we Awazada ýaşyl şäherleri toplumlaýyn ösdürmek» taslamasy BMG-niň Ösüş maksatnamasy we Türkmenistanyň Oba hojalygy we daşky gurşawy goramak ministrligi tarapyndan bilelikde ýerine ýetirilýär.
ORIENT habarlar
