Türkmen edaralarynyň hünärmenleri sanly ykdysadyýetdäki bütindünýä trendleri öwrenýärler
Dürli ministrlikleriň we edaralaryň, Mejlisiň, Türkmenistanyň Merkezi bankynyň, TürkmenistanyňPrezidentiniň ýanyndaky Döwlet gullugy akademiýasynyň wekilleri, şeýle hem Aşgabadyň häkimliginiň işgärleri «Sanly ykdysadyýetiň bütindünýä trendleri» atly bäş günlük seminara gatnaşýarlar.
Gibrid formatynda geçirilýän seminar BMGÖM-nyň gatnaşmagyndaky «Türkmenistanyň Prezidentiniň ýanyndaky Döwlet gullugy akademiýasynyň mümkinçiliklerini ýokarlandyrmak» taslamasyny ýerine ýetirmegiň bir bölegi bolup durýar.
Onuň maksady döwleti dolandyrmaklygyň netijeliligini ýokarlandyrmak üçin iň täze sanly çözgütleri ornaşdyrmak babatynda döwlet gullukçylarynyň mümkinçilikleriniň ösdürilmegine ýardam etmekdir.
Bu okuwy maglumat-kommunikasiýa tehologiýalary ugrundan halkara bilermen Andreý Leonowiç geçirýär. Ol ykdysadyýetiň sanlylaşdyrylmagynyň ýurduň beýleki pudaklaryna edýän täsiri barada gürrüň berer, sanly özgertmeler babatynda meýilleri we iň gowy halkara tejribelerini paýlaşar.
Gatnaşyjylar şeýle hem ykdysadyýetiň sanlylaşdyrylmagynda kiberhowpsuzlygy üpjün etmegiň meselelerine garap geçerler, ýeke-täk maglumatlar binýady bilen işlemegiň ýörelgelerini özleşdirerler.
«Sanlylaşdyrmak babatynda iň gowy dünýä tejribeleriniň we meýilleriniň mysalynda bu çäräniň Türkmenistanyň sanly özgerdilmesiniň umumy ösüşine itergi berjekdigine garaşylýar» - diýip, BMGÖM-nyň Türkmenistandaky maksatnama departamentiniň ýolbaşçysy Röwşen Nurmuhammedow aýtdy.
ORIENT habarlar
