Türkmenistanyň wekiliýeti BMG-niň BA-nyň Galyndysyz önümçilik baradaky ýokary derejedäki maslahatyna gatnaşar
Türkmenistanyň Daşary işler ministriniň orunbasary Mähri Bäşimowa 30-njy martda Nýu-Ýorkda geçjek BMG-niň Baş Assambleýasynyň Galyndysyz önümçilik baradaky ýokary derejedäki maslahatyna gatnaşar – diýip, Türkmenistanyň BMG-niň ýanyndaky Hemişelik wekilhanasynyň saýtynda habar berilýär.
Çäräniň çäklerinde şeýle hem döwrebap şäher bolan Arkadagyň – Ahal welaýatynyň täze dolandyryş merkeziniň tanyşdyrylyşy bolar, onda galyndysyz tehnologiýalar, akylly şäher ulgamlary we döwrebäp ekologik çözgütler giňden ulanylýar.
Mähri Bäşimowa BMG-niň ýokary wezipeli şahslary bilen parahatçylygy pugtalandyrmak we sebit we bütindünýä derejesinde durnukly ösüşi gazanmak babatynda halkara hyzmatdaşlygyny giňeltmekligi ara alyp maslahatlaşmak üçin birnäçe duşuşyklary geçirer.
Galyndysyz dünýä üçin Halkara güni mynasybetly maslahat 2030-njy ýyla çenli Durnukly ösüşiň gün tertibine ýetmek üçin galyndylaryň ekologik taýdan esaslandyrylyp ulanylmagyna ýardam etmek maksady bilen, BMG-niň Daşky gurşaw boýunça maksatnamasy we BMG-niň Ilatly nokatlar boýunça maksatnamasy (BMG Habitat) bilen bilelikde gurnalar.
Ol şeýle hem howanyň üýtgemegi boýunça Pariž ylalaşygynyň ýerine ýetirilmegine, biologiki dürlülik hakynda Konwensiýanyň, şäherleri ösdürmegiň Täze maksatnamasynyň we howply galyndylaryň serhetüsti daşalyşyna we olaryň ýok edilişine gözegçilik etmek hakynda Bazel konwensiýasynyň ýerine ýetirilmegine ýardam etmäge niýetlenendir.
ORIENT habarlar
