ÝUNESKO-da Türkmenistanyň şäher gurluşygy babatynda gazanan üstünliklerine ýokary baha berdiler
Türkmenistanyň Fransiýadaky ilçisi Maksat Çaryýew ÝUNESKO-nyň baş direktorynyň orunbasary Firmin Eduard Matoko bilen hyzmatdaşlygyň amaly jähtlerini ara alyp maslahatlaşdy.
Gepleşikleriň barşynda türkmen diplomaty ÝUNESKO-nyň wekillerini häzirki zaman ekologiki talaplar göz öňünde tutulyp we täze tehnologiýalar ulanylyp gurulýan täze Arkadag şäheriniň taslamasy bilen tanyşdyrdy.
Matoko şäher gurluşygynda türkmen tarapynyň üstünliklerine ýokary baha berdi.
Duşuşygyň barşynda Ahal welaýatynyň täze dolandyryş merkeziniň gurluşygy üçin ulanylýan sanly tehnologiýalara, şeýle hem «akylly şäher» ýörelgesi boýunça işlejek şäher giňişligine aýratyn üns çekildi.
Söhbetdeşler bilim, medeniýet, ylym we tehnologiýalar babatynda ikitaraplaýyn hyzmatdaşlygyň ähmiýetli derejesini, şeýle hem şäher gurşawynyň innowasion meýilleşdirilmegini bellediler.
ORIENT habarlar
