Budapeştde Özbegistanyň ilçihanasy açyldy - Wengriýanyň Daşary işler ministri
"Şu gün Budapeştde Özbegistanyň ilçihanasynyň açylmagy bilen, indi Wengriýada Türki döwletler guramasynyň ähli agza ýurtlarynyň diplomatik wekilhanalary bar" – diýip, Wengriýanyň Daşary işler we daşary ykdysady gatnaşyklar ministri Piter Siýýarto ilçihananyň “Facebook”-da ýaýlyma berlen açylyş dabarasynda aýtdy.
Siýýartodan başga-da, açylyşa Wengriýanyň Ykdysady ösüş ministri Marton Nad we Özbegistanyň Daşary işler ministriniň wezipesini ýerine ýetiriji Bahtiýor Saidow gatnaşdy. Ol 31 ýyllyk diplomatik gatnaşyklaryň dowamynda Özbegistanyň daşary syýasat edarasynyň Wengriýa baran ilkinji ýolbaşçysy boldy.
Siýýarto Wengriýanyň Daşkendiň golaýynda ýörite senagat zolagyny döredýändigini ýatlatdy, bu ýerde wenger kompaniýalary azyk senagaty, oba hojalygy, ýadro senagaty, derman senagaty, lukmançylyk enjamlarynyň önümçiligi we gurluşyk ýaly ugurlara maýa goýmak üçin ýörite hukuk derejesinden peýdalanarlar. Mundan başga-da, ol ýakynda Wengriýanyň iň iri OTP bankynyň Özbegistanda ululygy boýunça bäşinji orunda durýan maliýe edarasy bolan Ipoteka-banky satyn alandygyny belläp geçdi.
2009-njy ýylda döredilen Türki dilli döwletleriň hyzmatdaşlyk geňeşi (Türki Geňeş) 2021-nji ýylyň noýabr aýynda Stambul sammitinde adyny Türki döwletleriň guramasyna üýtgetmek kararyna geldi. Guramanyň düzümine Azerbaýjan, Gazagystan, Gyrgyzystan, Türkiýe girýär, Türkmenistan we Wengriýa synçy hökmünde gatnaşýar.
ORIENT news
