Antwerpen has ýakynlaşyp biler: türkmen ilçisi Belgiýanyň welaýat ýolbaşçysy bilen duşuşdy
Belgiýa kompaniýalarynyň maglumat tehnologiýalaryny durmuşa geçirmek, sanlaşdyrmak, “ýaşyl” ykdysadyýet taslamalaryny durmuşa geçirmek we täze türkmen şäheri Arkadagda ösdürmek ýaly ugurlarda maýa goýum geljegi Türkmenistanyň Belgiýa Patyşalygyndaky Adatdan daşary we Doly ygtyýarly ilçisi Sapar Pälwanow bilen Antwerpen welaýatynyň gubernatory Keti Beresiň arasynda 27-nji mart, duşenbe güni geçirilen duşuşygyň esasy mowzuklaryndan biri boldy.
Diplomat Köpetdagyň eteginde gurulýan Arkadag şäheriniň tanyşdyrylyşynyň barşynda onuň ýurtdaky ekologiýa taýdan arassa şäher derejesine eýe boljak ilkinji akylly şäherdigini belledi.
Ilçi Belgiýanyň resmisini sanly aragatnaşyk we innowasiýa pudagynyň ösüş depgini boýunça öňdebaryjy orny eýeleýän Antwerpeniň telekeçilerini we maýadarlaryny özüne çekýän bilelikdäki taslamalary durmuşa geçirmegiň mümkinçiliklerini öwrenmäge çagyrdy. Antwerpen dolandyryş merkezi Ýewropanyň iň iri tehnologiýa synag meýdançasy we şäher ilaty üçin amatly şertleri döretmäge kömek edýän ulgamlaryň barlaghanasy bolup durýar.
Şeýle hem Sapar Pälwanow we Keti Beres Türkmenistan bilen Antwerpen welaýatynyň arasynda işewür we ynsanperwer gatnaşyklary ýola goýmagyň beýleki meselelerini ara alyp maslahatlaşdylar. Bu nukdaýnazardan, ilçi Ýewropadaky ýük dolanyşygy boýunça niderland Rotterdamyndan soň ikinji ýerde durýan Antwerpen port şäheri bilen Türkmenbaşy şäheriniň arasynda dogan şäher gatnaşyklaryny ýola goýmagy teklip etdi. Dünýä ykdysadyýetinde möhüm orun eýeleýän portlardan başga-da iki şäherde-de nebiti gaýtadan işleýän toplumlar we beýleki zawodlar bar.
Bu teklip uly gyzyklanma bilen kabul edildi. Şu ýerde şäherleriň doganlaşmagy diňe bir ykdysady taýdan däl, eýsem medeniýet, bilim, ylym, syýahatçylyk we ş.m. ugurlarda ýakynlaşdyryp biljekdigi bellendi.
ORIENT news
