Ýer titreme hadysasyndan soň Türkiýäniň zoo dükanlarynda totyguş satuwy artdy
Türkiýäniň günorta-gündogarynda bolup geçen weýrançylykly ýer titremelerinden soň ýurtda totyguşlara bolan gyzyklanma artdy, öý guşlarynyň ýerasty sarsgynlary öňünden duýýandygy baradaky maglumat esasynda totyguşlaryň satuwy ýokarlandy – diýip, “Yeni Akit” neşiri ýazýar.
7,7 we 7,6 bal magnitudaly ýer titremeleri 6-njy fewralda Türkiýäniň günorta-gündogaryndaky Kahramanmaras welaýatynda dokuz sagat tapawut bilen bolup geçdi. Ýer sarsgynlary ýurduň 11 welaýatynda we goňşy döwletlerde, şol sanda Siriýada duýuldy. Neşir: "Kahramanmarasda bolup geçen we 11 welaýata täsir eden ýer titremelerinden soň, ýer yranma hadysasyny öňünden duýýan guşlaryň howsalaly hereketleri edýändiklerine bolan ynam totyguşlara gyzyklanmany artdyrdy" – diýip, ýazýar.
Türkiýäniň Elazyg welaýatyndaky zoo dükanlarda alyjylaryň sanynyň köpelendigi habar berilýär.
Dükanyň eýesi Fatih Gürbüz ýer titremelerinden soň satuwlaryň, takmynan 10 esse artandygyny aýtdy. Gazet onuň "Bilşiňiz ýaly, guşlaryň ýer titremesini öňünden duýýandyklary baradaky gürrüňlerden soň raýatlar uly gyzyklanma bildirýärler" – diýen sözlerini getirýär.
Onuň sözlerine görä, maşgalalar öý guşlaryny ýer titremesi wagtynda çagalaryň başdan geçiren gorkusyny ýeňip geçmek üçin alýarlar.
ORIENT news
