Türkmenistan Minskdäki halkara kitap sergisine gatnaşýar
Türkmenistan 22-nji martdan 26-njy mart aralygynda Belarussiýanyň paýtagtynda "Serhetsiz kitaplar dünýäsi" şygary bilen geçirilýän XXX Minsk halkara kitap ýarmarkasyna gatnaşýar.
Belarus Respublikasynda akkreditlenen 16 sany diplomatik wekilhananyň, şol sanda Türkmenistanyň ilçihanasynyň stendleri serginiň esasy bezegine öwrülip, bu ýerde ilçihana işgärleri milli kitap taslamalaryny, taryhy, ylmy-publisistik neşirleri, taryh, medeniýet we sungat boýunça žurnallary sergä gatnaşýanlaryň dykgatyna hödürlediler.
Milli stend ýurduň şu günki gününi, däp-dessurlaryny we häzirki zaman binagärligini şekillendirýän owadan suratlar bilen dolduryldy. Türkmen milli eşikleri – gyrmyzy don we ak silkme telpek sergä gatnaşyjylaryň we myhmanlaryň ünsüni çekdi, diplomatik wekilhananyň işgärleriniň biriniň egnindäki milli lybaslar bilesigelijilik we köp sorag döretdi.
Kitap sergisiniň hormatly myhmanlarynyň arasynda Russiýanyň Prezidentiniň halkara medeni hyzmatdaşlyk boýunça ýörite wekili Mihail Şwydkoý hem bar. Ol "Türkmenistan" ýazgyly we ýaşyl baýdakly stendiň gabadyna ýetip, ýurdumyzyň wekilleri bilen elleşip salamlaşdy.
ORIENT news
