Türkmenbaşydaky halkara deňiz portunyň terminallary ynamdar dolandyryşa berlip bilner
Türkmenistan, Türkmenbaşydaky deňiz portunyň terminallaryny ynamdar dolandyryşa geçirmek mümkinçliklerini gözden geçirýär. Bu mowzuk Türkmenistanyň «Türkmendeňizderýaýollary» agentliginiň we «KPMG Tax and Advisory LLC» halkara kompaniýasynyň wekilleri bilen geçirilen onlaýn-duşuşykda ara alyp maslahatlaşyldy, – diýip Suw ulaglary agentliginiň resmi saýtynda çap edilen habarda aýdylýar.
Ynamdar dolandyryş – bu aktiwleriň eýesiniň baglaşylan şertnama esasynda ynamdar dolandyryja – maýa goýuja ýa-da beýleki ynanylan şahsa geçirmeginiň usulydyr. Hukuk tejribesinde, dolandyryşyň bu görnüşinde eýeçilik hukugy emlägiň eýesinde galýar we ynamdar dolandyryjy olary diňe öz bähbidine dolandyrýar.
Ynamdar dolandyryşynyň maksatlarynyň ýene biri bolsa, Türkmenistanyň ykdysadyýetine daşarky we içerki maýa goýumlaryny çekmek. KPMG kompaniýasynyň wekilleri Türkmenbaşy şäherindäki halkara deňiz portunyň hyzmatlaryny we mümkinçiliklerini giňeltmekde hyzmatdaşlyga gyzyklanma bildirdiler.
KPMG – audit, salgyt we maslahat hyzmatlaryny berýän halkara firmalaryň torunyň işleýän global markasydyr. Kompaniýanyň ofisleri häzirki wagtda 219 000 işgäri işleýän dünýäniň 147 ýurdunda bar. KPMG-iň wezipesi bazardaky ýagdaýy seljermek, strategiýa we iş alyp barmak çemeleşmelerini işläp düzmek.
BAE-niň AD Ports Group kompaniýasynyň ozal Türkmenbaşydaky halkara deňiz portunyň konteýner terminalyny uzak möhletleýin ynamdar dolandyryşa almak isleýändigini ýatladýarys.
ORIENT news
