Astrahandaky türkmen talyplary Halkara Nowruz gününi bellediler
W.N. Tatyşew adyndaky Astrahan döwlet uniwersitetinde (ADU) Halkara Nowruz gününi bellemäge bagyşlanan çäre geçirildi. Bu barada Türkmenistanyň Russiýa Federasiýasynyň Astrahan şäherindäki konsullygynyň saýtynda habar berilýär.
Çäre ýokary okuw mekdebiniň professor-mugallymlar düzüminiň, Astrahanyň döwlet edaralarynyň wekilleriniň we oblastyň dürli diasporalarynyň gatnaşmagynda geçdi.
Dürli döwletlerden bolan talyplar öz ýurtlarynyň medeniýeti, milli däpleri we dessurlary bilen tanyşdyrýan diwarlyklary taýýarladylar.
Türkmenistandan baran talyplar konsullygyň goldaw bermeginde elde dokalan haly önümlerini, milli egin-eşikleri, türkmen el işleriniň ussatlarynyň ýakalaryny, kümüş şaý-seplerini hödürlediler.
Myhmanlar biziň ýurdumyz hakyndaky materiallary okap, tanyş boldular, şeýle hem Türkmenistanyň Halk Maslahatynyň Başlygy Gurbanguly Berdimuhamedowyň ylmy işleri bilen tanşyp, türkmen aşhanasynyň tagamlaryny dadyp gördüler.
Türkmen talyplary baýramçylyk çäresiniň dowamynda «Küştdepdi» milli tansyny hem ýerine ýetirdiler.
ORIENT habarlar
