Türkmenistanyň syýahatçylyk kompaniýalary goraghanalar boýunça täze ugurlary işläp düzerler
Türkmenistanyň syýahatçylyk kompaniýalary daşary ýurt syýahatçylaryny çekmek üçin goraghana ýerleri boýunça täze ugurlary işläp düzmekligi meýilleşdirýärler.
Bu barada ýurdumyzda syýahatçylygy ösdürmegiň esasy ugurlary we mümkinçilikleri temasy boýunça Aşgabatda geçen halkara maslahatynda belli boldy – diýip, «Neýtralnyý Turkmenistan» gazeti ýazýar.
«Esasy wezipe biziň ýurdumyza gelýän syýahatçylaryň sanyny artdyrmakdyr. Öz tarapymyzdan türkmen welaýatlarynyň, şäherleriniň, maddy we maddy däl medeni ýadygärlikleriniň täze garaýyşdaky mahabatyny ösdürmeli. Türkmen syýahatçylygyny ösdürmek üçin meýilnamalarymyz we taslamalarymyz bizde ýeterlikdir. Ilkinji nobatda – bu goraghana ýerleri boýunça täze ugurlary işläp düzmek» – diýip, «Atlas» syýahatçylyk kompaniýasynyň wekili Myrat Öwezow gürrüň berdi.
Maslahatyň işine ona golaý ýurduň wekilleri gatnaşdylar. Şanhaýyň (Hytaý) syýahatçylyk kompaniýalarynyň biriniň baş direktory Žun Žen «Türkmenistana syýahat etmek şanhaýlylaryň göwnünden turar, olar ekzotikany, söwda etmegi halaýarlar, bu ýerde bolsa seredere, satyn almaga-da zat bar» – diýip aýtdy.
Türkmenistanyň Medeniýet ministrliginiň Syýahatçylyk müdirliginiň başlygynyň orunbasarynyň bellemegine görä, maslahat, ilkinji nobatda, ýurdumyzyň syýahatçylygyny ösdürmek üçin daşary ýurtly hyzmatdaşlar bilen tejribe alyşmaklyga gönükdirilendir. Häzirki wagtda Türkmenistanda bu ugurda 70-e golaý kompaniýa işleýär.
ORIENT habarlar
